ਪਟਨਾ, 16 ਜੁਲਾਈ
ਪਟਨਾ ਦੇ ਬਖਤਿਆਰਪੁਰ 'ਚ ਮੰਗਲਵਾਰ ਨੂੰ ਨਵਾਦਾ-ਬਖਤਿਆਰਪੁਰ ਚਾਰ ਮਾਰਗੀ ਹਾਈਵੇਅ 'ਤੇ ਵਾਪਰੇ ਦਰਦਨਾਕ ਹਾਦਸੇ 'ਚ 6 ਲੋਕਾਂ ਦੀ ਮੌਤ ਹੋ ਗਈ ਜਦਕਿ 5 ਹੋਰ ਗੰਭੀਰ ਰੂਪ 'ਚ ਜ਼ਖਮੀ ਹੋ ਗਏ।
ਇਹ ਭਿਆਨਕ ਹਾਦਸਾ ਇੱਕ ਤੇਜ਼ ਰਫ਼ਤਾਰ ਸਕਾਰਪੀਓ ਐਸਯੂਵੀ ਦੇ ਪਿੱਛੇ ਤੋਂ ਖੜ੍ਹੇ ਹਾਈਵਾ ਟਰੱਕ ਨਾਲ ਟਕਰਾ ਜਾਣ ਕਾਰਨ ਵਾਪਰਿਆ।
ਐਸਡੀਪੀਓ ਬਾਰਹ ਅਭਿਸ਼ੇਕ ਸਿੰਘ ਨੇ ਦੱਸਿਆ ਕਿ ਸਕਾਰਪੀਓ ਵਿੱਚ 11 ਯਾਤਰੀ ਸਵਾਰ ਸਨ ਅਤੇ ਨਵਾਦਾ ਇਲਾਕੇ ਤੋਂ ਜਾ ਰਹੀ ਸੀ।
ਉਨ੍ਹਾਂ ਦੱਸਿਆ ਕਿ ਹਾਈਵਾ ਟਰੱਕ ਖੜ੍ਹਾ ਸੀ ਤਾਂ ਪਿੱਛੇ ਤੋਂ ਆ ਰਹੀ ਤੇਜ਼ ਰਫ਼ਤਾਰ ਸਕਾਰਪੀਓ ਐਸਯੂਵੀ ਨੇ ਉਸ ਨੂੰ ਟੱਕਰ ਮਾਰ ਦਿੱਤੀ। “ਚਾਰ ਵਿਅਕਤੀਆਂ ਦੀ ਮੌਕੇ ‘ਤੇ ਮੌਤ ਹੋ ਗਈ, ਜਦੋਂ ਕਿ ਇੱਕ ਨੇ ਬਖਤਿਆਰਪੁਰ ਦੇ ਇੱਕ ਹਸਪਤਾਲ ਵਿੱਚ ਅਤੇ ਦੂਜੇ ਨੇ ਪਟਨਾ ਮੈਡੀਕਲ ਕਾਲਜ ਅਤੇ ਹਸਪਤਾਲ (ਪੀਐਮਸੀਐਚ) ਵਿੱਚ ਦਮ ਤੋੜ ਦਿੱਤਾ। ਬਾਕੀ ਪੰਜ ਯਾਤਰੀ ਇਸ ਸਮੇਂ ਪੀਐਮਸੀਐਚ ਵਿੱਚ ਦਾਖਲ ਹਨ, ਉਨ੍ਹਾਂ ਦੀ ਹਾਲਤ ਨਾਜ਼ੁਕ ਹੈ, ”ਸਿੰਘ ਨੇ ਕਿਹਾ।
ਸਿੰਘ ਨੇ ਪੰਜ ਮ੍ਰਿਤਕਾਂ ਦੀ ਪਛਾਣ ਰਿਸ਼ੂ ਕੁਮਾਰੀ (5), ਨੀਰਜ ਕੁਮਾਰ (25), ਪਾਰਵਤੀ ਦੇਵੀ ਭਗਤੀਨੀ (60), ਨਿਰਮਲਾ ਦੇਵੀ ਅਤੇ ਕਮਲਾ ਦੇਵੀ ਵਜੋਂ ਕੀਤੀ ਹੈ ਜਦਕਿ ਛੇਵੇਂ ਦੀ ਪਛਾਣ ਕੀਤੀ ਜਾ ਰਹੀ ਹੈ।
ਜ਼ਖ਼ਮੀਆਂ ਦੀ ਪਛਾਣ ਇੰਦੂ ਦੇਵੀ, ਨੀਤੂ ਕੁਮਾਰੀ, ਕੌਸ਼ਲ ਕੁਮਾਰ, ਕੀਟੂ ਕੁਮਾਰ ਅਤੇ ਮੀਨਾ ਦੇਵੀ ਵਜੋਂ ਹੋਈ ਹੈ, ਜੋ ਸਾਰੇ ਨਵਾਦਾ ਵਾਸੀ ਹਨ।