ਚੰਡੀਗੜ੍ਹ: 05 ਅਗਸਤ, 2024
14ਵੇਂ "ਭਾਰਤੀ ਅੰਗ ਦਾਨ ਦਿਵਸ" ਦੇ ਮੌਕੇ 'ਤੇ ਪੱਛਮੀ ਕਮਾਂਡ ਨੇ ਚੰਡੀਮੰਦਰ ਮਿਲਟਰੀ ਸਟੇਸ਼ਨ ਵਿਖੇ 'ਅੰਗ ਦਾਨ ਜਾਗਰੂਕਤਾ' ਪ੍ਰੋਗਰਾਮ ਦਾ ਆਯੋਜਨ ਕੀਤਾ। ਇਸ ਸਮਾਗਮ ਵਿੱਚ ਲੈਫਟੀਨੈਂਟ ਜਨਰਲ ਮਨੋਜ ਕੁਮਾਰ ਕਟਿਆਰ, ਜੀਓਸੀ-ਇਨ-ਸੀ ਪੱਛਮੀ ਕਮਾਂਡ, ਸ੍ਰੀਮਤੀ ਸ਼ੁਚੀ ਕਟਿਆਰ, ਖੇਤਰੀ ਪ੍ਰਧਾਨ ਆਵਾ, ਪੱਛਮੀ ਕਮਾਂਡ ਅਤੇ ਡਾ: ਮਨੀਸ਼ ਬਾਂਸਲ, ਡਾਇਰੈਕਟਰ ਜਨਰਲ ਸਿਹਤ ਸੇਵਾਵਾਂ, ਹਰਿਆਣਾ ਸ਼ਾਮਲ ਸਨ।ਇਸ ਸਮਾਗਮ ਵਿੱਚ ਸੇਵਾ ਕਰ ਰਹੇ ਸੈਨਿਕਾਂ, ਉਨ੍ਹਾਂ ਦੇ ਪਰਿਵਾਰਾਂ ਅਤੇ ਆਰਮੀ ਪਬਲਿਕ ਸਕੂਲ ਅਤੇ ਕੇਂਦਰੀ ਵਿਦਿਆਲਿਆ, ਚੰਡੀਮੰਦਰ ਮਿਲਟਰੀ ਸਟੇਸ਼ਨ ਦੇ ਸਕੂਲੀ ਬੱਚਿਆਂ ਸਮੇਤ 400 ਤੋਂ ਵੱਧ ਲੋਕਾਂ ਨੇ ਭਾਗ ਲਿਆ।
ਇਸ ਮੌਕੇ 'ਤੇ ਸੰਬੋਧਨ ਕਰਦਿਆਂ ਆਰਮੀ ਕਮਾਂਡਰ ਨੇ ਦੱਸਿਆ ਕਿ ਅੰਗਦਾਨ ਮਨੁੱਖੀ ਭਲਾਈ ਅਤੇ ਜੀਵਨ ਲਈ ਇੱਕ ਉੱਤਮ ਕਾਰਜ ਹੈ ਅਤੇ ਹਰੇਕ ਨਾਗਰਿਕ ਨੂੰ ਅੰਗ ਦਾਨ ਕਰਨ ਦਾ ਪ੍ਰਣ ਲੈਣ ਦੀ ਲੋੜ 'ਤੇ ਜ਼ੋਰ ਦਿੱਤਾ।ਉਨ੍ਹਾਂ ਨੇ ਹਾਜ਼ਰ ਦਾਨੀਆਂ ਦੇ ਪਰਿਵਾਰਾਂ ਦੀ ਤਹਿ ਦਿਲੋਂ ਸ਼ਲਾਘਾ ਕੀਤੀ ਅਤੇ ਸਾਰਿਆਂ ਨੂੰ ਅੰਗਦਾਨ ਪ੍ਰਤੀ ਜਾਗਰੂਕਤਾ ਫੈਲਾਉਣ ਲਈ ਪ੍ਰੇਰਿਤ ਕੀਤਾ।
ਜੀਓਸੀ-ਇਨ-ਸੀ, ਪੱਛਮੀ ਕਮਾਨ ਅਤੇ ਖੇਤਰੀ ਪ੍ਰਧਾਨ ਆਵਾ,ਪੱਛਮੀ ਕਮਾਂਡ ਨੇ ਅੰਗ ਦਾਨ ਕਰਨ ਵਾਲੇ ਸੈਨਿਕਾਂ ਦੇ ਪਰਿਵਾਰਾਂ ਨੂੰ ਸਨਮਾਨਿਤ ਕੀਤਾ। ਇਨ੍ਹਾਂ ਵਿਅਕਤੀਆਂ ਵਿੱਚ ਸੂਬੇਦਾਰ ਅਰਜੁਨ ਸਿੰਘ, ਹਵਲਦਾਰ ਰਾਜੇਸ਼ ਸਿੰਘ ਅਤੇ ਕਾਂਸਟੇਬਲ ਅੰਕਿਤ ਦੇ ਪਰਿਵਾਰ ਸ਼ਾਮਲ ਸਨ, ਜਿਨ੍ਹਾਂ ਨੇ ਆਪਣੇ ਪਿਤਾ ਦੇ ਅੰਗ ਦਾਨ ਕੀਤੇ ਸਨ।
ਇਸ ਆਯੋਜਨ ਦਾ ਉਦੇਸ਼ ਭਾਸ਼ਣਾਂ, ਪ੍ਰੇਰਣਾਦਾਇਕ ਵੀਡੀਓਜ਼ ਰਾਹੀਂ ਅਤੇ ਦੂਸਰਿਆਂ ਨੂੰ ਨਵੀਂ ਜ਼ਿੰਦਗੀ ਪ੍ਰਦਾਨ ਕਰਨ ਵਾਲੇ ਪੁਰਸ਼ ਅਤੇ ਔਰਤ ਦਾਨੀਆਂ ਦੇ ਨਿਰਸਵਾਰਥ ਕਾਰਜਾਂ ਨੂੰ ਮਾਨਤਾ ਦੇ ਕੇ ਅੰਗਦਾਨ ਦੀ ਮਹੱਤਤਾ ਅਤੇ ਜਾਗਰੂਕਤਾ ਫੈਲਾਉਣਾ ਸੀ। ਇਸ ਤੋਂ ਇਲਾਵਾ ਮ੍ਰਿਤਕ ਅੰਗ ਦਾਨ ਸਬੰਧੀ ਮਿੱਥਾਂ ਅਤੇ ਮਤਭੇਦਾਂ ਨੂੰ ਦੂਰ ਕਰਨ ਲਈ ਇੱਕ ਪੈਨਲ ਚਰਚਾ ਵੀ ਕੀਤੀ ਗਈ। ਸਮਾਗਮ ਦੌਰਾਨ ਮੁੱਖ ਮਹਿਮਾਨ ਵੱਲੋਂ ਅੰਗਦਾਨ ਦੀ ਪ੍ਰਕਿਰਿਆ ਅਤੇ ਅੰਗ ਦਾਨ ਕਰਨ ਦੀ ਪ੍ਰਤੀਬੱਧਤਾ ਨੂੰ ਦਰਸਾਉਂਦੇ ਪੈਂਫਲੈਟ ਵੀ ਜਾਰੀ ਕੀਤੇ ਗਏ ਅਤੇ ਵੰਡੇ ਗਏ।