ਜ਼ਿਲ੍ਹਾ ਲਿਖਾਰੀ ਸਭਾ ਦੀ ਮਾਸਿਕ ਇਕੱਤਰਤਾ `ਚ ਚੱਲੀ ਸ਼ਾਇਰੀ ਨੇ ਕੀਲੇ ਸਰੋਤੇ

 

ਜ਼ਿਲ੍ਹਾ ਲਿਖਾਰੀ ਸਭਾ ਫ਼ਤਹਿਗੜ੍ਹ ਸਾਹਿਬ ਦੀ ਮਾਸਿਕ ਇਕੱਤਰਤਾ ਅਸ਼ੋਕਾ ਸੀਨੀਅਰ ਸੈਕੰਡਰੀ ਸਕੂਲ, ਸਰਹਿੰਦ ਵਿਖੇ ਸਭਾ ਦੇ ਸਰਪ੍ਰਸਤ ਲਾਲ ਮਿਸਤਰੀ ਦੀ ਅਗਵਾਈ ਵਿੱਚ ਹੋਈ। ਜ਼ਿਕਰਯੋਗ ਹੈ ਕਿ ਜ਼ਿਲ੍ਹਾ ਲਿਖਾਰੀ ਸਭਾ ਦੀ ਪ੍ਰਧਾਨ ਬੀਬੀ ਪਰਮਜੀਤ ਕੌਰ ਸਰਹਿੰਦ ਸਿਹਤ ਠੀਕ ਨਾ ਹੋਣ ਕਾਰਨ ਇਸ ਇਕੱਤਰਤਾ ਵਿੱਚ ਪਹੁੰਚ ਨਹੀਂ ਸਕੇ। ਲਛਮਣ ਸਿੰਘ ਤਰੌੜਾ ਤੇ ਪ੍ਰੇਮ ਲਤਾ ਪ੍ਰਧਾਨਗੀ ਮੰਡਲ ਵਿੱਚ ਸ਼ਾਮਲ ਰਹੇ। ਸਭਾ ਦੇ ਜਨਰਲ ਸਕੱਤਰ ਹਰਜਿੰਦਰ ਸਿੰਘ ਗੋਪਾਲੋਂ ਨੇ ਮੰਚ ਦਾ ਸੰਚਾਲਨ ਕੀਤਾ। ਇਸ ਮੌਕੇ ਉਭਰਦੇ ਸ਼ਾਇਰ ਸੁਖਵੰਤ ਸਿੰਘ ਤੇ ਸੰਦੀਪ ਕੁਮਾਰ ਨੇ ਵਿਸ਼ੇਸ਼ ਤੌਰ 'ਤੇ ਸ਼ਿਰਕਤ ਕੀਤੀ। ਇਸ ਮੌਕੇ ਕਵੀ ਜਸਵਿੰਦਰ ਸਿੰਘ ਨੇ 'ਮੁਹੱਬਤ ਕਰ, ਇਜ਼ਹਾਰ ਨਾ ਕਰ', ਰਣਜੀਤ ਸਿੰਘ ਨੇ 'ਦੁਨੀਆਂ ਇੱਕ ਬਾਜ਼ਾਰ ਹੈ ਸੱਜਣਾ' ਪ੍ਰੋਫੈਸਰ ਸਾਧੂ ਸਿੰਘ ਪਨਾਗ ਨੇ 'ਅਹਿਸਾਨ' ਬਲਤੇਜ ਸਿੰਘ ਬਠਿੰਡਾ ਨੇ 'ਦੂਸ਼ਿਤ ਹੋਏ ਪਾਣੀ', ਅਮਰਬੀਰ ਸਿੰਘ ਚੀਮਾ ਨੇ 'ਪ੍ਰਵਾਸ', ਲੱਛਮਣ ਸਿੰਘ ਤਰੌੜਾ ਨੇ 'ਜੋਬਨ, ਮਸਤੀ, ਸੁੰਦਰ ਕਵਿਤਾ', ਪ੍ਰੇਮ ਲਤਾ ਨੇ 'ਦੱਸਾਂਗੇ, ਦੱਸਣ ਵਾਲੀ ਗੱਲ ਤਾਂ ਹੋਵੇ' ਲਾਲ ਮਿਸਤਰੀ ਨੇ 'ਅਸੀਂ ਰੋਏ ਰਾਤ ਸਾਰੀ, ਚੰਨ ਤਾਰਿਆਂ ਤੋਂ ਪੁੱਛ` ਕਵਿਤਾਵਾਂ ਨਾਲ਼ ਆਪਣੀ ਹਾਜ਼ਰੀ ਲਗਵਾਈ। ਅਵਤਾਰ ਸਿੰਘ ਪੁਆਰ ਨੇ 'ਤਿਉਹਾਰ ਦਿਵਾਲੀ ਦਾ' ਗੀਤ ਪੇਸ਼ ਕੀਤਾ ਜਦੋਂ ਕਿ ਹਰਜਿੰਦਰ ਸਿੰਘ ਗੋਪਾਲੋਂ ਨੇ 'ਹਰ ਦਿਨ ਦਾ ਇਤਿਹਾਸ' ਕਵਿਤਾ ਤੇ 'ਹੈਲੋ, ਮੈਂ ਪਿੰਡ ਬੋਲਦਾਂ' ਗੀਤ ਗਾਇਆ। ਅੰਤ ਵਿੱਚ ਸਰਪ੍ਰਸਤ ਲਾਲ ਮਿਸਤਰੀ ਨੇ ਆਪਣੇ ਪ੍ਰਧਾਨਗੀ ਭਾਸ਼ਣ ਵਿੱਚ ਸੁਣਾਈਆਂ ਰਚਨਾਵਾਂ ਦੀ ਪੜਚੋਲ ਕੀਤੀ ਅਤੇ ਪਹੁੰਚੇ ਕਵੀਆਂ ਤੇ ਸ਼ਾਇਰਾਂ ਦਾ ਧੰਨਵਾਦ ਕੀਤਾ। ਇਸ ਮੌਕੇ ਉਹਨਾਂ ਸਾਬਕਾ ਮੈਨੇਜਰ ਸਵ. ਊਧਮ ਸਿੰਘ ਤੇ ਉਘੇ ਗਜ਼ਲਗੋ ਸਵ. ਸੁਰਜੀਤ ਸਿੰਘ ਜੀਤ ਨੂੰ ਵੀ ਯਾਦ ਕੀਤਾ।