ਸੜਕ ਕਿਨਾਰੇ ਖੜ੍ਹੀ 55 ਸਾਲਾਂ ਔਰਤ ਦੀ ਸੜਕ ਹਾਦਸੇ ਵਿੱਚ ਮੌਤ

ਬਨੂੜ, 5 ਅਕਤੂਬਰ (ਅਵਤਾਰ ਸਿੰਘ)

ਬੀਤੀ ਸ਼ਾਮ ਬਨੂੜ ਦੇ ਬੱਸ ਸਟੈਂਡ ਤੇ ਬੱਸ ਚੋਂ ਉਤਰਨ ਵਾਲੀ 55 ਸਾਲਾਂ ਔਰਤ ਨੂੰ ਛੋਟੇ ਹਾਥੀ (ਟੈਂਪੂ) ਵੱਲੋਂ ਦਰੜ ਦੇਣ ਅਤੇ ਇਸ ਹਾਦਸੇ ਵਿੱਚ ਉਕਤ ਔਰਤ ਦੀ ਮੌਤ ਹੋ ਜਾਣ ਦਾ ਸਮਾਚਾਰ ਹੈ । ਮ੍ਰਿਤਕ ਦੇ ਭਤੀਜੇ ਗੁਰਦੀਪ ਸਿੰਘ ਭਾਊ ਵਾਰਡ ਨੰ: 8 ਬਨੂੜ ਨੇ ਦੱਸਿਆ ਕਿ ਬੀਤੀ ਸ਼ਾਮ ਉਸ ਦੀ ਭੂਆ ਅਮਰੀਕ ਕੌਰ ਪਤਨੀ ਮਹਿੰਗਾ ਸਿੰਘ ਵਾਸੀ ਪਿੰਡ ਧਨੇਠਾਂ (ਸਮਾਣਾ) ਤੋਂ ਮਿਲਣ ਲਈ ਇਥੇ ਘਰ ਆ ਰਹੇ ਸਨ, ਕਿ ਜਦੋਂ ਉਹ ਬਨੂੜ ਦੇ ਬੱਸ ਸਟੈਂਡ ਤੇ ਬੱਸ ਤੋਂ ਉਤਰ ਕੇ ਸੜਕ ਕਿਨਾਰੇ ਖੜੀ ਹੋਈ, ਅਚਾਨਕ ਰਾਜਪੁਰਾ ਵੱਲੋਂ ਇੱਕ ਤੇਜ਼ ਰਫਤਾਰ ਚਾਰ ਪਹੀਆ ਛੋਟਾ ਹਾਥੀ ਭੂਆ ਨੂੰ ਟੱਕਰ ਮਾਰੀ। ਜਿਸ ਕਾਰਨ ਉਹ ਗੰਭੀਰ ਜ਼ਖ਼ਮੀ ਹੋ ਗਈ ਅਤੇ ਉਸ ਨੂੰ ਹਾਈਵੇ ਪੈਟਰੋਲੀਅਮ ਪੁਲਿਸ ਚੁੱਕ ਕੇ ਇਲਾਜ ਲਈ ਗਿਆਨ ਸਾਗਰ ਹਸਪਤਾਲ ਵਿਖੇ ਲੈ ਗਈ। ਜਿੱਥੇ ਡਾਕਟਰਾਂ ਨੇ ਉਸਦੀ ਗੰਭੀਰ ਹਾਲਤ ਨੂੰ ਦੇਖਦੇ ਹੋਏ ਚੰਡੀਗੜ੍ਹ ਦੇ ਪੀਜੀਆਈ ਹਸਪਤਾਲ ਵਿਖੇ ਰੈਫਰ ਕਰ ਦਿੱਤਾ। ਜਿੱਥੇ ਉਸ ਦੀ ਇਲਾਜ ਦੌਰਾਨ ਮੌਤ ਹੋ ਗਈ। ਗੁਰਦੀਪ ਭਾਊ ਨੇ ਦੱਸਿਆ ਕਿ ਹਾਦਸੇ ਨੂੰ ਅੰਜਾਮ ਦੇਣ ਵਾਲਾ ਛੋਟਾ ਹਾਥੀ ਮੌਕੇ ਤੋਂ ਫਰਾਰ ਹੋ ਗਿਆ।