ਨਸ਼ੇ ਵਾਲੀਆਂ ਗੋਲੀਆਂ ਰੱਖਣ ਦੇ ਮਾਮਲੇ 'ਚ ਤਿੰਨ ਔਰਤਾਂ ਸਣੇ ਚਾਰ ਜਣਿਆਂ ਨੂੰ ਕੈਦ ਤੇ ਜੁਰਮਾਨਾ

ਬਰਨਾਲਾ, 26 ਨਵੰਬਰ (ਧਰਮਪਾਲ ਸਿੰਘ)

ਵਧੀਕ ਜ਼ਿਲ੍ਹਾ ਅਤੇ ਸੈਸ਼ਨਜ ਜੱਜ ਸ੍ਰੀ ਕਪਿਲ ਦੇਵ ਸਿੰਗਲਾ ਦੀ ਅਦਾਲਤ ਨੇ ਨਸ਼ੇ ਵਾਲੀਆਂ ਗੋਲੀਆਂ ਰੱਖਣ ਦੇ ਮਾਮਲੇ ਦਾ ਫੈਸਲਾ ਸੁਣਾਉਂਦਿਆ ਕੇਸ ਵਿੱਚ ਨਾਮਜ਼ਦ ਕਮਲ ਉਰਫ ਕਮਲ ਕ੍ਰਿਸ਼ਨ ਅਤੇ ਮਨਜੀਤ ਕੌਰ ਨੂੰ 15-15 ਸਾਲ ਦੀ ਕੈਦ ਅਤੇ ਡੇਢ-ਡੇਢ ਲੱਖ ਰੁਪਏ ਜੁਰਮਾਨਾ ਅਤੇ ਚਰਨੋ ਕੌਰ ਅਤੇ ਭੂਰੋ ਕੌਰ ਨੂੰ 5-5 ਸਾਲ ਦੀ ਸਜ਼ਾ ਅਤੇ 50-50 ਹਜ਼ਾਰ ਰੁਪਏ ਜੁਰਮਾਨਾ ਅਦਾ ਕਰਨ ਦਾ ਹੁਕਮ ਸੁਣਾਇਆ ਹੈ । ਕੇਸ ਦੀ ਜਾਣਕਾਰੀ ਅਨੁਸਾਰ ਪੁਲਿਸ ਪਾਰਟੀ ਬੱਸ ਸਟੈਂਡ ਫਰਵਾਹੀ ਵਿਖੇ ਮੌਜੂਦ ਸੀ, ਜਿਸ ਦੌਰਾਨ ਪੁਲਿਸ ਨੂੰ ਗੁਪਤ ਸੂਚਨਾ ਮਿਲੀ ਕਿ ਕਮਲ ਉਰਫ ਕਮਲ ਕ੍ਰਿਸ਼ਨ ਅਤੇ ਮਨਜੀਤ ਕੌਰ ਨਸ਼ੀਲੀਆਂ ਗੋਲੀਆਂ ਪਿੰਡ ਫਰਵਾਹੀ, ਸੇਖਾ ਤੇ ਜਲੂਰ ਵਿਖੇ ਵੇਚਦੇ ਹਨ ਅਤੇ ਅੱਜ ਵੀ ਮੋਟਰਸਾਈਕਲ ਤੇ ਸਵਾਰ ਹੋ ਕੇ ਸੰਗਰੂਰ ਤੋਂ ਬਰਨਾਲਾ ਵੇਚਣ ਲਈ ਆ ਰਹੇ ਹਨ । ਪੁਲਿਸ ਨੇ ਗੁਪਤ ਸੂਚਨਾ ਦੇ ਆਧਾਰ ਤੇ ਟੀ-ਪੁਆਇੰਟ ਫਰਵਾਹੀ ਮੇਨ ਰੋਡ ਬਰਨਾਲਾ ਤੇ ਨਾਕਾਬੰਦੀ ਕਰਕੇ ਚੈਕਿੰਗ ਸ਼ੁਰੂ ਕਰ ਦਿੱਤੀ, ਚੈਕਿੰਗ ਦੌਰਾਨ ਜਦ ਇੱਕ ਮੋਟਰਸਾਈਕਲ ਨੂੰ ਇਸ਼ਾਰਾ ਕਰਕੇ ਰੋਕਿਆ ਤਾਂ ਮੋਟਰਸਾਈਕਲ ਪਿੱਛੇ ਬੈਠੀ ਔਰਤ ਪੁਲਿਸ ਨੂੰ ਦੇਖ ਕੇ ਘਬਰਾ ਗਈ ਤੇ ਆਪਣੇ ਹੱਥ ਵਿੱਚ ਫੜਿਆ ਝੋਲਾ ਪਲਾਸਟਿਕ ਹੇਠਾਂ ਸੁੱਟ ਦਿੱਤਾ ਜਦ, ਦੋਵਾਂ ਨੂੰ ਕਾਬੂ ਕਰਕੇ ਝੋਲੇ ਨੂੰ ਚੈੱਕ ਕੀਤਾ ਤਾਂ ਉਸ ਵਿੱਚੋਂ 2500 ਨਸ਼ੀਲੀਆਂ ਗੋਲੀਆਂ ਬਰਾਮਦ ਹੋਈਆਂ । ਮੋਟਰਸਾਈਕਲ ਤੇ ਸਵਾਰ ਮਰਦ ਔਰਤ ਦੀ ਪਛਾਣ ਕਮਲ ਉਰਫ ਕਮਲ ਕ੍ਰਿਸ਼ਨ ਅਤੇ ਮਨਜੀਤ ਕੌਰ ਵਜੋਂ ਹੋਈ । ਮਨਜੀਤ ਕੌਰ ਨੇ ਪੁੱਛ-ਗਿੱਛ ਦੌਰਾਨ ਦੱਸਿਆ ਕਿ ਉਹ ਕਮਲ ਉਰਫ ਕਮਲ ਕ੍ਰਿਸ਼ਨ ਤੋਂ ਗੋਲੀਆਂ ਖਰੀਦ ਕੇ ਅੱਗੇ ਚਰਨੋ ਅਤੇ ਭੂਰੋ ਕੌਰ ਨੂੰ ਵੇਚਦੀ ਹੈ । ਪੁਲਿਸ ਨੇ 24 ਜੁਲਾਈ 2021 ਨੂੰ ਕਮਲ ਉਰਫ ਕਮਲ ਕ੍ਰਿਸ਼ਨ, ਮਨਜੀਤ ਕੌਰ, ਚਰਨੋ ਕੌਰ, ਭੂਰੋ ਕੌਰ ਖਿਲਾਫ ਮੁਕੱਦਮਾ ਨੰਬਰ 91 ਧਾਰਾ 22 (ਸੀ), 29/61/85 ਐਨ.ਡੀ ਐਂਡ ਪੀ.ਐਸ ਐਕਟ ਤਹਿਤ ਥਾਣਾ ਸਾਦਰ ਬਰਨਾਲਾ ਵਿਖੇ ਕੇਸ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਸੀ । ਸਥਾਨਕ ਅਦਾਲਤ ਵਿੱਚ ਚੱਲੀ ਅਦਾਲਤੀ ਕਾਰਵਾਈ ਦੌਰਾਨ ਸਰਕਾਰੀ ਵਕੀਲ ਸ਼ਿਵ ਕੁਮਾਰ ਗਰਗ ਦੀਆਂ ਦਲੀਲਾਂ ਨਾਲ ਸਹਿਮਤ ਹੁੰਦਿਆਂ ਵਧੀਕ ਜ਼ਿਲ੍ਹਾ ਅਤੇ ਸੈਸ਼ਨਜ ਜੱਜ ਸ੍ਰੀ ਕਪਿਲ ਦੇਵ ਸਿੰਗਲਾ ਨੇ ਕਮਲ ਉਰਫ ਕਮਲ ਕ੍ਰਿਸ਼ਨ ਤੇ ਮਨਜੀਤ ਕੌਰ ਨੂੰ ਦੋਸ਼ੀ ਮੰਨਦਿਆਂ 15-15 ਸਾਲ ਦੀ ਕੈਦ ਅਤੇ ਡੇਢ-ਡੇਢ ਲੱਖ ਰੁਪਏ ਜੁਰਮਾਨਾ ਅਦਾ ਕਰਨ ਦਾ ਹੁਕਮ ਸੁਣਾਇਆ ਹੈ, ਜੁਰਮਾਨਾ ਨਾ ਭਰਨ ਦੀ ਸੂਰਤ ਵਿੱਚ 6 ਮਹੀਨਿਆਂ ਦੀ ਸਜ਼ਾ ਹੋਰ ਕੱਟਣੀ ਪਵੇਗੀ ਜਦ ਕਿ ਚਰਨੋ ਕੌਰ ਅਤੇ ਭੂਰੋ ਕੌਰ ਨੂੰ 5-5 ਸਾਲ ਦੀ ਸਜ਼ਾ ਅਤੇ 50-50 ਹਜਾਰ ਰੁਪਏ ਜੁਰਮਾਨਾ ਅਦਾ ਕਰਨ ਦਾ ਹੁਕਮ ਸੁਣਾਇਆ ਹੈ। ਜੁਰਮਾਨਾ ਨਾ ਭਰਨ ਦੀ ਸੂਰਤ ਵਿੱਚ ਤਿੰਨ ਮਹੀਨਿਆਂ ਦੀ ਸਜ਼ਾ ਹੋਰ ਭੁਗਤਨੀ ਪਵੇਗੀ