ਜੈਪੁਰ, 27 ਅਪ੍ਰੈਲ (ਏਜੰਸੀ) : ਰਾਜਸਥਾਨ ਪੁਲਿਸ ਨੇ ਸ਼ਨੀਵਾਰ ਨੂੰ ਅਜਮੇਰ 'ਚ ਇਕ ਮਸਜਿਦ 'ਚ ਮੌਲਵੀ ਦੀ ਹੱਤਿਆ ਕੀਤੇ ਜਾਣ ਤੋਂ ਬਾਅਦ ਸ਼ਹਿਰ 'ਚ ਵਾਧੂ ਬਲ ਤਾਇਨਾਤ ਕਰ ਦਿੱਤੇ ਹਨ।
ਘਟਨਾ ਦੀ ਸੂਚਨਾ ਸ਼ਨੀਵਾਰ ਤੜਕੇ 3 ਵਜੇ ਦੇ ਕਰੀਬ ਮਿਲੀ, ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਤਿੰਨ ਨਕਾਬਪੋਸ਼ ਬਦਮਾਸ਼ਾਂ ਨੇ ਇਸ ਵਾਰਦਾਤ ਨੂੰ ਅੰਜਾਮ ਦਿੱਤਾ। ਘਟਨਾ ਦੇ ਸਮੇਂ ਮਸਜਿਦ ਵਿੱਚ ਛੇ ਨਾਬਾਲਗ ਸਨ, ਜਿਨ੍ਹਾਂ ਨੂੰ ਧਮਕਾਇਆ ਗਿਆ ਅਤੇ ਚੀਕਾਂ ਨਾ ਮਾਰਨ ਲਈ ਕਿਹਾ ਗਿਆ।
ਨਾਬਾਲਗਾਂ ਨੇ ਕਿਹਾ ਕਿ ਬਦਮਾਸ਼ਾਂ ਨੇ ਉਨ੍ਹਾਂ ਨੂੰ ਰੌਲਾ ਪਾਉਣ 'ਤੇ ਗੰਭੀਰ ਨਤੀਜੇ ਭੁਗਤਣ ਦੀ ਚਿਤਾਵਨੀ ਦਿੱਤੀ।
ਰਾਮਗੰਜ ਥਾਣਾ ਇੰਚਾਰਜ ਰਵਿੰਦਰ ਖਿੰਚੀ ਨੇ ਦੱਸਿਆ, ''ਮੌਲਵੀ ਮੁਹੰਮਦ ਮਾਹੀਰ (30) ਸ਼ਹਿਰ ਦੇ ਰਾਮਗੰਜ ਥਾਣੇ ਦੇ ਕੰਚਨ ਨਗਰ 'ਚ ਸਥਿਤ ਮੁਹੰਮਦੀ ਮਦੀਨਾ ਮਸਜਿਦ 'ਚ ਰਹਿੰਦਾ ਸੀ। ਉਸ ਦੇ ਨਾਲ ਕੁਝ ਬੱਚੇ ਵੀ ਰਹਿ ਰਹੇ ਸਨ। ਸਵੇਰੇ ਕਰੀਬ 3 ਵਜੇ ਬੱਚੇ ਰੌਲਾ ਪਾਉਂਦੇ ਹੋਏ ਬਾਹਰ ਆਏ ਤਾਂ ਗੁਆਂਢੀਆਂ ਨੂੰ ਕਤਲ ਦਾ ਪਤਾ ਲੱਗਾ। ਇਸ ਤੋਂ ਤੁਰੰਤ ਬਾਅਦ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ।"
ਖਿੰਚੀ ਨੇ ਦੱਸਿਆ ਕਿ ਤਿੰਨ ਬਦਮਾਸ਼ ਮਸਜਿਦ ਦੇ ਪਿੱਛੇ ਬਣੀ ਸੜਕ ਰਾਹੀਂ ਕਮਰੇ 'ਚ ਦਾਖਲ ਹੋਏ ਅਤੇ ਮੌਲਵੀ ਦਾ ਕਤਲ ਕਰ ਦਿੱਤਾ। ਉਹ ਉਸੇ ਰਸਤੇ ਤੋਂ ਭੱਜ ਗਏ।
ਥਾਣਾ ਇੰਚਾਰਜ ਨੇ ਦੱਸਿਆ ਕਿ ਕਤਲ ਦੇ ਕਾਰਨਾਂ ਦਾ ਅਜੇ ਤੱਕ ਖੁਲਾਸਾ ਨਹੀਂ ਹੋਇਆ ਹੈ। ਮਸਜਿਦ ਦੇ ਪਿੱਛੇ ਇੱਕ ਘੇਰਾ ਹੈ, ਜਿੱਥੋਂ ਦੋ ਡੰਡੇ ਬਰਾਮਦ ਹੋਏ ਹਨ। ਇਸ ਦੇ ਨਾਲ ਹੀ ਆਸਪਾਸ ਦੇ ਸੀਸੀਟੀਵੀ ਫੁਟੇਜ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ। ਡਾਗ ਸਕੁਐਡ ਟੀਮ ਨੂੰ ਵੀ ਬੁਲਾਇਆ ਗਿਆ ਹੈ।
ਮੁਹੱਲਾ ਵਾਸੀਆਂ ਨੇ ਪੁਲੀਸ ਤੋਂ ਮੁਲਜ਼ਮਾਂ ਨੂੰ ਤੁਰੰਤ ਗ੍ਰਿਫ਼ਤਾਰ ਕਰਨ ਦੀ ਮੰਗ ਕੀਤੀ ਹੈ। ਮੌਲਵੀ ਦੀ ਲਾਸ਼ ਨੂੰ ਜੇਐਲਐਨ ਹਸਪਤਾਲ, ਅਜਮੇਰ ਦੇ ਮੁਰਦਾਘਰ ਵਿੱਚ ਰੱਖਿਆ ਗਿਆ ਹੈ।