ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਰਲਡ ਯੂਨੀਵਰਸਿਟੀ ਵਿਖੇ ਭਗਤ ਲਛਮਣ ਸਿੰਘ ਦੀ ਕਿਤਾਬ ‘ਨਾਨਕ ਲੇਖੈ ਇਕ ਗੱਲ’ ‘ਤੇ ਅਕਾਦਮਿਕ ਵਿਚਾਰ-ਚਰਚਾ

 

ਪੰਜਾਬੀ ਵਿਭਾਗ, ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਰਲਡ ਯੂਨੀਵਰਸਿਟੀ, ਫਤਿਹਗੜ੍ਹ ਸਾਹਿਬ ਵੱਲੋਂ ਭਗਤ ਲਛਮਣ ਸਿੰਘ ਦੀ ਕਿਤਾਬ ‘ਨਾਨਕ ਲੇਖੈ ਇਕ ਗੱਲ’ (ਅਨੁਵਾਦਕ ਤੇ ਸੰਪਾਦਕ: ਡਾ. ਹਰਦੇਵ ਸਿੰਘ) ਉੱਤੇ ਵਿਚਾਰ-ਚਰਚਾ ਦਾ ਆਯੋਜਨ ਕੀਤਾ ਗਿਆ। ਇਸ ਵਿਚਾਰ-ਚਰਚਾ ਦਾ ਆਰੰਭ ਡਾ. ਸੁਖਵਿੰਦਰ ਸਿੰਘ ਬਿਲਿੰਗ, ਡੀਨ, ਅਕਾਦਮਿਕ ਮਾਮਲੇ ਵੱਲੋਂ ਕੀਤਾ ਗਿਆ। ਉਨ੍ਹਾਂ ਨੇ ਪੁਸਤਕ ਅਤੇ ਆਏ ਹੋਏ ਵਿਦਵਾਨਾਂ ਨਾਲ ਜਾਣ-ਪਛਾਣ ਕਰਾਈ।ਵਿਦਵਾਨ ਵਕਤਾ ਡਾ. ਬਲਕਾਰ ਸਿੰਘ, ਸਾਬਕਾ ਡਾਇਰੈਕਟਰ, ਵਰਲਡ ਪੰਜਾਬੀ ਸੈਂਟਰ ਨੇ ਭਗਤ ਲਛਮਣ ਸਿੰਘ ਦੇ ਹਵਾਲੇ ਨਾਲ ਸਿੱਖ ਪਰਿਪੇਖ ਨੂੰ ਸਿੱਖ ਅਕਾਦਮਿਕਤਾ ਵਿੱਚ ਸਥਾਪਤ ਕਰਨ ਦੀ ਗੱਲ ਕੀਤੀ। ਉਨ੍ਹਾਂ ਨੇ ਕਿਹਾ ਕਿ ਸਿੱਖ ਅਕਾਦਮਿਕਤਾ ਨੂੰ ਪ੍ਰਤੀਕਿਰਿਆਵਾਦੀ ਹੋਣ ਤੋਂ ਬਚਣ ਦੀ ਲੋੜ ਹੈ।ਇਸ ਮੌਕੇ ਵਕਤਾ ਪ੍ਰੋ. ਕੇਹਰ ਸਿੰਘ, ਸਾਬਕਾ ਚੇਅਰਮੈਨ, ਪੰਜਾਬ ਸਕੂਲ ਸਿੱਖਿਆ ਬੋਰਡ ਨੇ ਅਧਿਆਤਮ ਦੀ ਅੰਦਰੂਨੀ ਤੇ ਬਾਹਰੀ ਅਭਿਆਸ ਵਿੱਚ ਏਕਤਾ ਦੀ ਗੱਲ ਕੀਤੀ। ਉਨ੍ਹਾਂ ਨੇ ਪੂਰਬਵਾਦ ਦੇ ਹਵਾਲੇ ਨਾਲ ਪੁਸਤਕ ਬਾਰੇ ਕਿਹਾ ਕਿ ਰਵਿੰਦਰ ਨਾਥ ਟੈਗੋਰ ਅਤੇ ਜਾਦੂਨਾਥ ਸਰਕਾਰ ਦੇ ਵਿਚਾਰ ਪੂਰਬਵਾਦ ਦੇ ਪ੍ਰਭਾਵ ਹੇਠ ਆਕਾਰ ਗ੍ਰਹਿਣ ਕਰਦੇ ਹਨ।ਪ੍ਰਸਤੁਤ ਕਿਤਾਬ ਦੇ ਸੰਪਾਦਕ ਤੇ ਅਨੁਵਾਦਕ, ਡਾ. ਹਰਦੇਵ ਸਿੰਘ ਨੇ ਵਿਦਵਾਨਾਂ ਦੇ ਵਿਚਾਰਾਂ ਨੂੰ ਜੀ ਆਇਆਂ ਆਖਿਆ।

 

ਉਨ੍ਹਾਂ ਨੇ ਸਿੱਖ ਅਕਾਦਮਿਕਤਾ ਦੀ ਲੋੜ ਨੂੰ ਮੰਨਦੇ ਹੋਏ ਪ੍ਰੋ. ਕੇਹਰ ਸਿੰਘ ਦੇ ਵਿਚਾਰਾਂ ਵਿੱਚ ਵਾਧਾ ਕਰਦਿਆਂ ਕਿਹਾ ਕਿ ਜਾਦੂਨਾਥ ਸਰਕਾਰ ਤੇ ਟੈਗੋਰ ਦੇ ਵਿਚਾਰ ਕੇਵਲ ਪੂਰਬਵਾਦ ਤੋਂ ਹੀ ਨਹੀਂ, ਸਗੋਂ ਭਾਰਤ ਦੀ ਨਾਥ ਜੋਗੀ ਪਰੰਪਰਾ ਤੋਂ ਵੀ ਪ੍ਰਭਾਵਿਤ ਹਨ।ਵਾਈਸ-ਚਾਂਸਲਰ, ਡਾ. ਪ੍ਰਿਤ ਪਾਲ ਸਿੰਘ ਨੇ ਪ੍ਰਸਤੁਤ ਕਿਤਾਬ ਦੀ ਇਤਿਹਾਸਿਕ ਮਹੱਤਤਾ ਉੱਤੇ ਵਿਚਾਰ ਪ੍ਰਗਟ ਕੀਤੇ ਅਤੇ ਸਿੱਖ ਅਕਾਦਮਿਕਤਾ ਨੂੰ ਉਤਸ਼ਾਹਿਤ ਕਰਨ ਲਈ ਹਰ ਤਰ੍ਹਾਂ ਦਾ ਸਹਿਯੋਗ ਦੇਣ ਦਾ ਭਰੋਸਾ ਦਿੱਤਾ।ਅੰਤ ਵਿੱਚ, ਡਾ. ਸਿਕੰਦਰ ਸਿੰਘ ਨੇ ਪ੍ਰੋਗਰਾਮ ਵਿੱਚ ਸ਼ਾਮਲ ਵਿਦਵਾਨਾਂ, ਅਧਿਆਪਕਾਂ ਅਤੇ ਵਿਦਿਆਰਥੀ ਸਰੋਤਿਆਂ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਨੇ ਪ੍ਰਸਤੁਤ ਕਿਤਾਬ ਦੀ ਸਮੱਸਿਆ ਨੂੰ ਪੰਜਾਬ ਦੇ ਅੰਗਰੇਜ਼ੀ ਰਾਜ ਵਿੱਚ ਰਲਵੇਂ ਦੇ ਪਿਛੋਕੜ ਨਾਲ ਇਤਿਹਾਸਕ ਤੱਥਾਂ ਰਾਹੀਂ ਵੇਖਣ ਦੀ ਕੋਸ਼ਿਸ਼ ਕੀਤੀ ਅਤੇ ਇਸ ਉੱਤੇ ਹੋਰ ਚਰਚਾਵਾਂ ਦੀ ਸੰਭਾਵਨਾ ਪ੍ਰਗਟ ਕੀਤੀ।ਇਸ ਤਰ੍ਹਾਂ, ਇਸ ਵਿਚਾਰ-ਚਰਚਾ ਨੇ ਕਿਤਾਬ ਦੇ ਵਿਭਿੰਨ ਪੱਖਾਂ ਨੂੰ ਸਾਹਮਣੇ ਲਿਆਂਦੇ ਹੋਏ, ਭਵਿੱਖ ਵਿੱਚ ਹੋਣ ਵਾਲੀਆਂ ਹੋਰ ਅਕਾਦਮਿਕ ਚਰਚਾਵਾਂ ਲਈ ਰਾਹ ਖੋਲ੍ਹਿਆ। ਇਸ ਸਮਾਗਮ ਦਾ ਮੰਚ-ਸੰਚਾਲਨ ਡਾ. ਬਿੰਦਰ ਸਿੰਘ ਨੇ ਕੀਤਾ।