ਜੰਗਲੀ ਜੀਵ ਸੁਰੱਖਿਆ ਵਿਭਾਗ ਮੁਹਾਲੀ ਦੀ ਟੀਮ ਦਿਨ ਰਾਤ ਪਿੰਡਾਂ ਵਿਚ ਗਸਤ ਕਰ ਰਹੀਆਂ

ਖਰੜ,11 ਸਤੰਬਰ (ਕੁਲਦੀਪ ਸਿੰਘ ਢਿਲੋਂ):-

ਤਹਿਸੀਲ ਖਰੜ ਦੇ ਪਿੰਡ ਪੀਰ ਸੁਹਾਣਾ, ਸਿੰਬਲਮਾਜਰਾ ਅਤੇ ਪਿੰਡ ਰੁੜਕੀ ਪੁਖਤਾ ਦੇ ਖੇਤਾਂ ਵਿਚ ਤੇਦੂਏ ਨੂੰ ਲੈ ਕੇ ਜੰਗਲੀ ਜੀਵ ਸੁਰੱਖਿਆ ਵਿਭਾਗ ਮੁਹਾਲੀ ਦੀ ਟੀਮ ਵਲੋਂ ਅੱਜ ਤੇਦੂਆ ਦੀ ਭਾਲ ਨੂੰ ਲੈ ਕੇ ਤੀਸਰੇ ਦਿਨ ਵੀ ਜਾਂਚ ਕੀਤੀ ਗਈ, ਕਿਉਕਿ ਅੱਜ ਵੀ ਵਿਭਾਗ ਨੂੰ ਪਿੰਡ ਪੀਰ ਸੁਹਾਣਾ, ਰੁੜਕੀ ਪੁਖਤਾ ਨੇੜੇ ਖੇਤਾਂ ਵਿਚ ਤੇਦੂਏ ਘੁੰਮਦਾ ਵੇਖਿਆ ਗਿਆ ਸੀ। ਜੰਗਲੀ ਜੀਵ ਸੁਰੱਖਿਆ ਵਿਭਾਗ ਮੁਹਾਲੀ ਦੇ ਏਰੀਆ ਇੰਚਾਰਜ਼ ਪਰਮਿੰਦਰ ਸਿੰਘ, ਬਲਾਕ ਅਫਸਰ ਸੁਰਿੰਦਰਪਾਲ ਸਿੰਘ ਨੇ ਦਸਿਆ ਕਿ ਹਰਿੰਦਰ ਹਿਨਾ, ਦਲਜੀਤ ਕੌਰ ਦੋਵੇ ਵਣ ਕਾਰਡ ਅਤੇ ਕਰਮਜੀਤ ਸਿੰਘ ਬੇਲਦਾਰ ਦੀ ਅਗਵਾਈ ਵਾਲੀ ਟੀਮ ਵਲੋਂ ਸੂਚਨਾ ਮਿਲਣ ਤੇ ਅੱਜ ਤੀਸਰੀ ਵਾਰ ਖੇਤਾਂ ਵਿਚ ਜਾਂਚ ਕੀਤੀ ਗਈ ਅਤੇ ਤੇਦੂਏ ਦੇ ਪੈਰਾਂ ਦੇ ਨਿਸ਼ਾਨ ਲੈ ਕੇ ਛੱਤਬੀੜ ਚਿੜੀਘਰ ਵਿਖੇ ਭੇਜੇ ਗਏ ਤਾਂ ਕਿ ਪਤਾ ਲੱਗ ਸਕੇ ਕਿ ਇਹ ਤੇਦੂਏ ਦੇ ਹਨ ਜਾਂ ਨਹੀਂ। ਉਨ੍ਹਾਂ ਦਸਿਆ ਕਿ ਪਿੰਡ ਸਿੰਬਲਮਾਜਰਾ ਵਿਖੇ ਪਹਿਲਾਂ ਹੀ ਖੇਤਾਂ ਵਿਚ ਜਾਨਵਰ ਦੇ ਪੈਰਾਂ ਦੇ ਨਿਸ਼ਾਨ ਲਏ ਜਾ ਚੁੱਕੇ ਹਨ ਅਤੇ ਅੱਜ ਮੁੜ ਜਾਣਕਾਰੀ ਮਿਲੀ ਕਿ ਪਿੰਡ ਰੁੜਕੀ ਪੁਖਤਾ, ਪਿੰਡ ਪੀਰ ਸੁਹਾਣਾ ਦੇ ਖੇਤਾਂ ਵਿਚ ਸਵੇਰੇ ਕੰਮ ਕਰਨ ਵਾਲੇ ਕਿਸਾਨਾਂ ਨੇ ਤੇਦੂਆਂ ਘੁੰਮਦਾ ਵੇਖਿਆ ਜੋ ਚਰੀ ਫਸਲ ਵਿਚ ਵੜ੍ਹ ਗਿਆ ਜਿਸ ਤੇ ਤੁਰੰਤ ਬਾਅਦ ਵਿਭਾਗ ਨੂੰ ਸੂਚਨਾ ਮਿਲੀ ਅਤੇ ਟੀਮ ਮੌਕੇ ਤੇ ਪੁੱਜੀ ਅਤੇ ਭਾਲ ਕਰਨੀ ਸ਼ੁਰੂ ਕੀਤੀ। ਉਨ੍ਹਾ ਦਸਿਆ ਕਿ ਖਰੜ ਤਹਿਸੀਲ ਦੇ ਪਿੰਡ ਮਹਿਮੂਦਪੁਰ ਵਿਖੇ ਜੋ ਪਿਛਲੇ ਦਿਨੀ ਜਾਨਵਰ ਨੂੰ ਕਾਬੂ ਕਰਨ ਲਈ ਪਿੰਜਰਾ ਲਗਾਇਆ ਗਿਆ ਸੀ ਉਹ ਵੀ ਅੱਜ ਦੂਸਰੀ ਥਾਂ ਤੇ ਬਦਲਿਆ ਗਿਆ ਹੈ ਕਿਉਕਿ ਇਸ ਪਿੰਡ ਦੇ ਵਸਨੀਕਾਂ ਵਲੋਂ ਮੁੜ ਤੋਂ ਤੇਦੂਆਂ ਬਾਰੇ ਜਾਣਕਾਰੀ ਦਿੱਤੀ ਗਈ ਸੀ। ਇਨ੍ਹਾਂ ਪਿੰਡਾਂ ਵਿਚ ਜਿਸ ਤਰ੍ਹਾਂ ਦੀਆਂ ਸੂਚਨਾ ਮਿਲ ਰਹੀਆਂ ਹਨ ਉਨ੍ਹਾਂ ਨੂੰ ਵੇਖਦੇ ਹੋਏ ਪਿੰਜਰਾ ਲਗਾਇਆ ਜਾਵੇਗਾ। ਪਿੰਡ ਸਿੰਬਲਮਾਜਰਾ ਦੇ ਵਸਨੀਕ ਗੁਰਪ੍ਰੀਤ ਸਿੰਘ ਜੋ ਟੀਮ ਦੇ ਨਾਲ ਸਨ ਉਨ੍ਹਾਂ ਦਸਿਆ ਕਿ ਅਮਰਜੀਤ ਸਿੰਘ, ਜੀਵਨ ਸਿੰਘ, ਅਮਰਦੀਪ ਸਿੰਘ, ਨੀਟਾ ਰੁੜਕੀ ਸਮੇਤ ਹੋਰ ਪਿੰਡਾਂ ਦੇ ਵਸਨੀਕ ਹਾਜ਼ਰ ਸਨ। ਜੰਗਲੀ ਜੀਵ ਸੁਰੱਖਿਆ ਵਿਭਾਗ ਮੁਹਾਲੀ ਦੀ ਟੀਮ ਵਲੋਂ ਪਿੰਡਾਂ ਦੇ ਵਸਨੀਕਾਂ ਨੂੰ ਨਾਲ ਲੈ ਕੇ ਪਿੰਡ ਰੁੜਕੀ ਪੁਖਤਾ, ਪਿੰਡ ਸਿੰਬਲਮਾਜਰਾ ਵਿਖੇ ਟਰੈਕਟਰਾਂ ਤੇ ਚੜ੍ਹਕੇ ਸ਼ਾਮਲਾਤ ਜ਼ਮੀਨ ਵਿਚ ਤੇਦੂਆਂ ਦੀ ਭਾਲ ਕੀਤੀ। ਜੰਗਲੀ ਜੀਵ ਸੁਰੱਖਿਆ ਵਿਭਾਗ ਦੀ ਟੀਮ ਵਲੋਂ ਪਿੰਡਾਂ ਦੇ ਵਸਨੀਕਾਂ ਨੂੰ ਸੁਚੇਤ ਕਰਦਿਆ ਕਿਹਾ ਕਿ ਉਹ ਅਫਵਾਹਾਂ ਤੋਂ ਸੁਚੇਤ ਰਹਿਣ, ਦਿਨ ਰਾਤ ਵਿਭਾਗ ਦੀਆਂ ਟੀਮਾਂ ਦੀ ਗਸਤ ਇਸ ਖੇਤਰ ਦੇ ਪਿੰਡਾਂ ਵਿਚ ਕੀਤੀ ਜਾ ਰਹੀ ਹੈ ਜੇਕਰ ਕਿਤੇ ਵੀ ਇਸ ਤਰ੍ਹਾਂ ਦੀ ਗੱਲ ਹੁੰਦੀ ਹੈ ਤਾਂ ਉਹ ਸੂਚਨਾ ਦੇ ਸਕਦੇ ਹਨ।