ਹੋਲੇ ਮਹੱਲੇ ਤੋਂ ਅਕਾਦਮਿਕ ਜਗਤ ਨੂੰ ਮਿਲੇਗੀ ਵਡਮੁੱਲੀ ਪ੍ਰੇਰਨਾ: ਜਥੇਦਾਰ ਕੁਲਦੀਪ ਸਿੰਘ 

 

ਅੱਜ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਰਲਡ ਯੂਨੀਵਰਸਿਟੀ ਫਤਿਹਗੜ੍ਹ ਸਾਹਿਬ ਦੇ ਵਿਰਾਸਤੀ ਗਿਆਨ ਕੇਂਦਰ ਵੱਲੋਂ ਦੋ ਰੋਜਾ ਸੰਵਾਦ ਸਮਾਗਮ ਦਾ ਆਗਾਜ਼ ਕੀਤਾ ਗਿਆ। ਹੋਲੇ ਮਹੱਲੇ ਨੂੰ ਸਮਰਪਿਤ ਇਸ ਸਮਾਗਮ ਦੇ ਉਦਘਾਟਨੀ ਸੈਸ਼ਨ ਦੀ ਸਰਪ੍ਰਸਤੀ ਕਰਦਿਆਂ ਸਿੰਘ ਸਾਹਿਬ ਗਿਆਨੀ ਕੁਲਦੀਪ ਸਿੰਘ ਜਥੇਦਾਰ ਤਖਤ ਸ਼੍ਰੀ ਕੇਸਗੜ੍ਹ ਸਾਹਿਬ ਨੇ ਆਖਿਆ ਕਿ ਯੂਨੀਵਰਸਿਟੀ ਵੱਲੋਂ ਖਾਲਸਾਈ ਪਰੰਪਰਾਵਾਂ ਨੂੰ ਨੌਜਵਾਨਾਂ ਤੱਕ ਪਹੁੰਚਾਉਣ ਦੀ ਇਹ ਪਹਿਲਕਦਮੀ ਸ਼ਲਾਘਾ ਯੋਗ ਹੈ। ਉਹਨਾਂ ਆਖਿਆ ਕਿ ਹੋਲੇ ਮਹੱਲੇ ਤੋਂ ਅਕਾਦਮਿਕ ਜਗਤ ਸਾਂਝੀਵਾਲਤਾ ਅਤੇ ਸਵੈਮਾਣ ਦੀ ਵੱਡੀ ਪ੍ਰੇਰਨਾ ਲੈ ਸਕਦਾ ਹੈ। ਵਾਈਸ ਚਾਂਸਲਰ ਪ੍ਰੋ. ਪਰਿਤ ਪਾਲ ਸਿੰਘ ਨੇ ਦੱਸਿਆ ਕਿ ਇਸ ਦੋ ਰੋਜ਼ਾ ਸਮਾਗਮ ਦੌਰਾਨ ਸਰੋਤੇ ਵੱਖ ਵੱਖ ਵਿਸ਼ਿਆਂ ਵਿੱਚ ਪ੍ਰਕਾਸ਼ਿਤ ਹੋਈਆਂ ਮਿਆਰੀ ਕਿਤਾਬਾਂ ਅਤੇ ਭਖਦੇ ਮਸਲਿਆਂ ਸਬੰਧੀ ਚਰਚਾ ਦੇ ਨਾਲ ਨਾਲ ਮਨੁੱਖੀ ਹੱਕਾਂ ਸਬੰਧੀ ਖੋਜ ਕਰਨ ਵਾਲੇ ਲਿਖਾਰੀਆਂ ਅਤੇ ਕਵੀਆਂ ਨੂੰ ਸੁਣ ਸਕਣਗੇ। ਉਦਘਾਟਨੀ ਵਕਤਾ ਪ੍ਰੋ. ਹਰਪਾਲ ਸਿੰਘ ਪੰਨੂ ਚੇਅਰਪਰਸਨ ਗੁਰੂ ਨਾਨਕ ਗਲੋਬਲ ਵੈਲਫੇਅਰ ਚੇਅਰ, ਚੰਡੀਗੜ੍ਹ ਯੂਨੀਵਰਸਿਟੀ, ਘੜੂਆਂ ਨੇ ਆਖਿਆ ਕਿ ਅਕਾਦਮਿਕ ਜਗਤ ਅਤੇ ਸਮਾਜ ਦੋਵਾਂ ਲਈ ਖੋਜ ਅਤੇ ਉਸਾਰੂ ਸਾਹਿਤ ਬੇਹਦ ਜਰੂਰੀ ਹਨ। ਉਹਨਾਂ ਆਖਿਆ ਕਿ ਹੋਲੇ ਮਹੱਲੇ ਦਾ ਖਾਲਸਾਈ ਸੱਭਿਆਚਾਰ ਨੂੰ ਲੋਕ ਅਤੇ ਪਰਲੋਕ ਮੁਖੀ ਬਣਾਉਣ ਵਿੱਚ ਵਿਚ ਬੇਹਦ ਮਹੱਤਵਪੂਰਨ ਯੋਗਦਾਨ ਹੈ। ਮਹਿਮਾਨਾਂ ਦਾ ਸਵਾਗਤ ਕਰਦਿਆਂ ਡੀਨ ਅਕਾਦਮਿਕ ਮਾਮਲੇ, ਪ੍ਰੋ. ਸੁਖਵਿੰਦਰ ਸਿੰਘ ਬਿਲਿੰਗ ਨੇ ਦੱਸਿਆ ਕਿ ਇਸ ਸਲਾਨਾ ਸਮਾਗਮ ਰਾਹੀਂ ਵਿਦਿਆਰਥੀਆਂ ਨੂੰ ਹਰ ਵਰੇ ਨਵੀਆਂ ਪ੍ਰਕਾਸ਼ਨਾਵਾਂ, ਲੇਖਕਾਂ, ਸਮਾਜ ਸੇਵੀਆਂ ਅਤੇ ਕਵੀਆਂ ਦੇ ਰੂਬਰੂ ਕਰਵਾਇਆ ਜਾਵੇਗਾ। ਉਹਨਾਂ ਆਖਿਆ ਕਿ ਅਜਿਹੇ ਕਾਰਜ ਯੂਨੀਵਰਸਿਟੀ ਦੇ ਮੂਲ ਉਦੇਸ਼ਾਂ ਦੀ ਪੂਰਤੀ ਕਰਦੇ ਹਨ। ਉਦਘਾਟਨੀ ਸੈਸ਼ਨ ਦਾ ਧੰਨਵਾਦ ਮਤਾ ਪੇਸ਼ ਕਰਦਿਆਂ ਵਿਰਾਸਤੀ ਗਿਆਨ ਪ੍ਰਬੰਧ ਕੇਂਦਰ ਦੇ ਕਨਵੀਨਰ ਡਾ ਹਰਦੇਵ ਸਿੰਘ ਨੇ ਖੁਸ਼ੀ ਜਾਹਰ ਕੀਤੀ ਕਿ ਸੰਵਾਦ ਸਮਾਗਮ ਵਿੱਚ ਪੰਜਾਬ ਅਤੇ ਖਾਲਸਾ ਪੰਥ ਦੀਆਂ ਨਾਮਵਰ ਪੰਥਕ, ਅਕਾਦਮਿਕ, ਸਾਹਿਤਕਾਰ ਅਤੇ ਖੋਜੀ ਸ਼ਖਸੀਅਤਾਂ ਸ਼ਮੂਲੀਅਤ ਕਰ ਰਹੀਆਂ ਹਨ। ਕਲਮਕਾਰਾਂ ਦੇ ਰੂਬਰੂ ਸੈਸ਼ਨ ਦੌਰਾਨ "ਦ ਕੌਰਸ ਆਫ 1984" ਪਪੁਸਤਕ ਦੇ ਲੇਖਕ ਵਜੀਰ ਸਨਮ ਸੁਤੀਰਥ ਸਿੰਘ ਅਤੇ "ਸਿੱਖ ਨਸਲ ਕੁਸ਼ੀ ਦਾ ਖੁਰਾ ਖੋਜ" ਪੁਸਤਕ ਦੇ ਲੇਖਕ ਗੁਰਜੰਟ ਸਿੰਘ ਵਿਦਿਆਰਥੀਆਂ ਦੇ ਰੂਬਰੂ ਹੋਏ। ਦੋਹਾਂ ਲੇਖਕਾਂ ਨੇ ਨਵੰਬਰ 84 ਦੇ ਪੀੜਤਾਂ ਨਾਲ ਵਾਪਰੀ ਅਣਮਨੁੱਖੀ ਜਬਰ ਦੇ ਵਾਕਿਆਤ ਸਾਂਝੇ ਕਰਦਿਆਂ ਵੱਖ ਵੱਖ ਸਰਕਾਰਾਂ ਦੀ ਨਿਆਂ ਪ੍ਰਤੀ ਬੇਰੁਖੀ ਦੀ ਚਰਚਾ ਕੀਤੀ। ਇਸ ਸੈਸ਼ਨ ਦੀ ਪ੍ਰਧਾਨਗੀ ਪ੍ਰੋਫੈਸਰ ਜਮਸ਼ੀਦ ਅਲੀ ਖਾਨ ਰਾਜਨੀਤੀ ਸ਼ਾਸਤਰ ਵਿਭਾਗ ਨੇ ਕੀਤੀ। ਉਹਨਾਂ ਆਖਿਆ ਕਿ ਨਵੰਬਰ 84 ਸਿੱਖ ਪੰਥ ਲਈ ਬੇਹਦ ਮਹੱਤਵਪੂਰਨ ਨੁਕਤਾ ਹੈ ਜਿਸ ਬਾਰੇ ਅਕਾਦਮਿਕ ਪੱਧਰ ਤੇ ਗੱਲ ਹੋਣੀ ਚਾਹੀਦੀ ਹੈ।ਕਿਤਾਬ ਸਮੀਖਿਆ ਸੈਸ਼ਨ ਦੌਰਾਨ ਪ੍ਰੋਫੈਸਰ ਸ਼ਰਨਜੀਤ ਸਿੰਘ ਢਿੱਲੋਂ, ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ, ਅੰਮ੍ਰਿਤਸਰ ਨੇ ਨੋਬਲ ਵਿਜੇਤਾ ਲੇਖਕ ਦੀ ਰਚਨਾ "ਗੁਡ ਇਕਨੋਮਿਕਸ ਫਾਰ ਹਾਰਡ ਟਾਈਮ" ਅਤੇ ਡਾ ਸਿਕੰਦਰ ਸਿੰਘ, ਮੁਖੀ, ਪੰਜਾਬੀ ਵਿਭਾਗ ਨੇ ਮਨਦੀਪ ਸਿੰਘ ਚਹਿਲ ਦੀ ਕਿਤਾਬ "ਨਿਉਟਨ ਤੋਂ ਹਿੰਸਕ ਬੋਸੋਨ ਤੱਕ" ਦੀ ਪੜਚੋਲ ਪੇਸ਼ ਕਰਦਿਆਂ ਦੋਹਾਂ ਕਿਤਾਬਾਂ ਨੂੰ ਸਬੰਧਿਤ ਵਿਸ਼ਿਆਂ ਲਈ ਮੁਲਵਾਨ ਯੋਗਦਾਨ ਮੰਨਿਆ। ਅੱਜ ਦੇ ਸਮਾਗਮ ਦੀ ਸੰਪੂਰਨਤਾ ਯੂਨੀਵਰਸਿਟੀ ਦੀ ਰਾਸ਼ਟਰੀ ਗੋਲਡ ਮੈਡਲਿਸਟ ਗਤਕਾ ਟੀਮ ਦੇ ਖਾਲਸਾਈ ਸ਼ਸਤਰਕਲਾ ਦੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਹੋਈ। ਵੱਖ-ਵੱਖ ਸੈਸ਼ਨ ਦੌਰਾਨ ਹਰਪ੍ਰੀਤ ਸਿੰਘ ਮੁਖੀ ਸੰਗੀਤ ਵਿਭਾਗ ਤੇ ਰਮਨਦੀਪ ਕੌਰ ਇੰਚਾਰਜ ਰਾਜਨੀਤੀ ਸ਼ਾਸਤਰ ਵਿਭਾਗ ਨੇ ਵਿਦਵਾਨ ਵਕਤਿਆਂ ਦਾ ਸਵਾਗਤ ਅਤੇ ਡਾ ਗਗਨਦੀਪ ਕੌਰ ਸਿੱਖਿਆ ਵਿਭਾਗ ਤੇ ਡਾ ਬਲਜੀਤ ਕੌਰ ਅੰਗਰੇਜ਼ੀ ਵਿਭਾਗ ਨੇ ਧੰਨਵਾਦ ਕੀਤਾ। ਡਾ ਪਲਵਿੰਦਰ ਕੌਰ, ਧਰਮ ਅਧਿਐਨ ਵਿਭਾਗ ਅਤੇ ਡਾ ਸਵਰਲੀਨ ਕੌਰ ਸੰਗੀਤ ਵਿਭਾਗ ਨੇ ਸਟੇਜ ਸਕੱਤਰ ਦੀ ਭੂਮਿਕਾ ਨਿਭਾਈ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਰਜਿਸਟਰਾਰ ਪ੍ਰੋਫੈਸਰ ਤੇਜਬੀਰ ਸਿੰਘ, ਡਿਪਟੀ ਰਜਿਸਟਰਾਰ ਜਗਜੀਤ ਸਿੰਘ, ਆਈ ਕਿਊ ਏਸੀ ਸੈਲ ਦੇ ਕੋਆਰਡੀਨੇਟਰ ਡਾ. ਅੰਕਦੀਪ ਕੌਰ ਅਟਵਾਲ, ਸਿੱਖਿਆ ਵਿਭਾਗ ਦੇ ਮੁਖੀ ਡਾ. ਹਰਨੀਤ ਬਲਿੰਗ, ਸਮਾਜ ਸ਼ਾਸਤਰ ਵਿਭਾਗ ਦੇ ਮੁਖੀ ਡਾ. ਨਵ ਸ਼ਗਨ ਦੀਪ ਕੌਰ, ਜੁਆਲੋਜੀ ਵਿਭਾਗ ਦੇ ਮੁਖੀ ਡਾ. ਚਰਨ ਕਮਲ ਸੇਖੋਂ, ਡਾ. ਰਿਚਾ ਬਰਾੜ, ਮੁਖੀ ਗਣਿਤ ਵਿਭਾਗ, ਡਾ. ਰਮਨਦੀਪ ਕੌਰ, ਮੈਨੇਜਮੈਂਟ ਵਿਭਾਗ, ਅਤੇ ਵੱਖ ਵੱਖ ਮੀਡੀਆ ਅਦਾਰਿਆਂ ਦੇ ਨੁਮਾਇੰਦੇ ਅਤੇ ਵੱਡੀ ਗਿਣਤੀ ਵਿੱਚ ਖੋਜਾਰਥੀ ਅਤੇ ਵਿਦਿਆਰਥੀ ਹਾਜ਼ਰ ਸਨ।