ਨੰਗਲ, 11 ਸਤੰਬਰ (ਸਤਨਾਮ ਸਿੰਘ)
ਬੀਤੀ ਦੇਰ ਰਾਤ ਤੇਂਦੂਏ ਨੇ ਮੁੜ ਸ਼ਹਿਰ ਨੰਗਲ ਵਿੱਚ ਦਸਤਕ ਦਿੱਤੀ। ਜਿਸਨੂੰ ਲੈ ਕੇ ਇਲਾਕੇ ਵਿੱਚ ਪੂਰੀ ਤਰ੍ਹਾਂ ਖੌਫ ਦਾ ਮਾਹੌਲ ਹੈ। ਹਾਲਾਂਕਿ ਜੰਗਲਾਤ ਵਿਭਾਗ ਵੱਲੋਂ ਉਕਤ ਖੁੰਖਾਰ ਜਾਨਵਰ ਨੂੰ ਫੜ੍ਹਨ ਦੇ ਲਗਾਤਾਰ ਉਪਰਾਲੇ ਕੀਤੇ ਜਾ ਰਹੇ ਹਨ ਪਰ ਉਕਤ ਜਾਨਵਰ ਵਿਭਾਗ ਤੋਂ ਪਕੜ ਤੋਂ ਦੂਰ ਹੀ ਹੈ। ਉਕਤ ਜਾਨਵਰ ਦਾ ਖੌਫ ਇੰਨਾਂ ਜ਼ਿਆਦਾ ਵੱਧ ਚੁੱਕਿਆ ਹੈ ਕਿ ਲੋਕਾਂ ਵੱਲੋਂ ਸਵੇਰੇ ਅਤੇ ਰਾਤ ਦੀ ਸੈਰ ਤੱਕ ਬੰਦ ਕਰ ਦਿੱਤੀ ਗਈ ਹੈ।
ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦਿਆਂ ਨੰਗਲ ਭਾਖੜਾ ਮੁੱਖ ਮਾਰਗ ਲਾਗੇ ਸ਼ਰਮਾ ਸਟੋਰ ਦੇ ਵਸਨੀਕ ਵਿਜੇ ਮੇਹਰਾ ਨੇ ਕਿਹਾ ਕਿ ਜਦੋਂ ਉਹ ਬੀਤੀ ਦੇਰ ਰਾਤ ਕਰੀਬ ਸਾਡੇ ਬਾਰ੍ਹਾਂ ਵਜੇ ਆਪਣੇ ਘਰ ਨੂੰ ਗੱਡੀ ਵਿੱਚ ਜਾ ਰਹੇ ਸੀ ਤਾਂ ਇੱਕ ਨਿੱਜੀ ਹਸਪਤਾਲ ਦੇ ਸਾਹਮਣੇ ਇੱਕ ਤੇਂਦੂਏ ਨੇ ਚਿੱਟੇ ਰੰਗ ਦੇ ਕੁੱਤੇ ਨੂੰ ਮੂੰਹ ਪਾਇਆ ਹੋਇਆ ਸੀ। ਜਿਵੇਂ ਹੀ ਗੱਡੀ ਦੀਆਂ ਲਾਈਟਾਂ ਉਸ ਖੁੰਖਾਰ ਜਾਨਵਰ ਤੇ ਪਈਆਂ, ਉਹ ਕੁੱਤੇ ਨੂੰ ਸੁਰੱਖਿਅਤ ਛੱਡ ਝਾੜੀਆਂ ਵੱਲ ਨੂੰ ਭੱਜ ਗਿਆ। ਜਿਸਦੀ ਉਸਦੇ ਮੋਬਾਇਲ ਵਿੱਚ ਵਿਡੀਓ ਵੀ ਕੈਦ ਹੋ ਚੁੱਕੀ ਹੈ ਤੇ ਘਟਨਾ ਦੀ ਸਾਰੀ ਜਾਣਕਾਰੀ ਜੰਗਲਾਤ ਵਿਭਾਗ ਨੂੰ ਦੇ ਦਿੱਤੀ ਗਈ ਹੈ।
ਦੂਜੇ ਪਾਸੇ ਜੰਗਲਾਤ ਵਿਭਾਗ ਦੇ ਮੁਲਾਜ਼ਮ ਅਮਿ੍ਰਤ ਲਾਲ ਸ਼ਰਮਾ ਨੇ ਕਿਹਾ ਕਿ ਬੀਤੇ ਦਿਨੀ ਤੇਂਦੂਏ ਦਾ ਬੱਚਾ ਪਿੰਡ ਤਲਵਾੜਾ ਕੋਲ ਵੇਖਿਆ ਗਿਆ ਸੀ। ਜਿਸਦੀ ਸ਼ੋਸ਼ਲ ਮੀਡੀਆ ਤੇ ਕਾਫੀ ਚਰਚਾ ਸੁਣਨ ਨੂੰ ਮਿਲੀ। ਉੱਚ ਅਧਿਕਾਰੀਆਂ ਦੇ ਹੁਕਮਾਂ ਤੋਂ ਬਾਅਦ ਸਾਡੇ ਵੱਲੋਂ ਜੰਗਲ ਵਿੱਚ ਪਿੰਜਰਾ ਲਗਾ ਦਿੱਤਾ ਗਿਆ ਸੀ ਪਰ ਬੀਤੀ ਦੇਰ ਰਾਤ ਇਸ ਜਾਨਵਰ ਨੂੰ ਮੁੂੜ ਨੰਗਲ ਭਾਖੜਾ ਮੁੱਖ ਮਾਰਗ ਤੇ ਸ਼ਿਕਾਰ ਦੀ ਭਾਲ ਵਿੱਚ ਘੁੰਮਦੇ ਵੇਖਿਆ ਗਿਆ। ਜਿਸਦੀ ਵਿਡੀਓ ਵੀ ਕਾਫੀ ਵਾਇਰਲ ਹੋ ਰਹੀ ਹੈ। ਜਿਵੇਂ ਹੀ ਸਾਨੂੰ ਉੱਚ ਅਧਿਕਾਰੀਆਂ ਤੋਂ ਇਸਦੀ ਸ਼ਹਿਰ ਵਿੱਚ ਮੁੜ ਦਸਤਕ ਦੇਣ ਦੀ ਖ਼ਬਰ ਮਿਲੀ। ਅਸੀਂ ਮੌਕੇ ਤੇ ਜਾ ਕੇ ਜਾਂਚ ਪੜਤਾਲ ਕੀਤੀ ਤਾਂ ਇਸ ਖੁੰਖਾਰ ਜਾਨਵਰ ਦੇ ਪੰਜੇ ਸੜਕ ਕੰਢੇ ਵੇਖਣ ਨੂੰ ਮਿਲੇ। ਜਿਸ ਮਗਰੋਂ ਪਿੰਜਰੇ ਵਾਲੀ ਥਾਂ ਬਦਲ ਦਿੱਤੀ ਗਈ ਹੈ।
ਜੰਗਲਾਤ ਵਿਭਾਗ ਦੇ ਮੁਲਾਜ਼ਮਾਂ ਨੇ ਕਿਹਾ ਕਿ ਤੇਂਦੂਆ ਇੱਕ ਦਿਨ ‘ਚ ਕਰੀਬ 30-35 ਕਿਲੋਮੀਟਰ ਦਾ ਸਫਰ ਤੈਅ ਕਰਦਾ ਹੈ। ਹੁਣ ਤੱਕ ਇਸ ਜਾਨਵਰ ਨੇ ਕਿਸੇ ਵਿਅਕਤੀ ਤੇ ਕੋਈ ਹਮਲਾ ਨਹੀਂ ਕੀਤਾ ਤੇ ਬਹੁਤ ਹੀ ਘੱਟ ਸੁਣਨ ਨੂੰ ਮਿਲਿਆ ਹੈ ਕਿ ਇਸਨੇ ਕਿਸੇ ਤੇ ਹਮਲਾ ਕੀਤਾ ਹੈ। ਇਸ ਸਿਰਫ ਕੁੱਤਿਆਂ, ਬਕਰੀਆਂ ਜਾਂ ਹੋਰ ਮਵੇਸ਼ੀਆਂ ਦਾ ਹੀ ਜ਼ਿਆਦਾ ਸ਼ਿਕਾਰ ਕਰਦਾ ਹੈ। ਪਰ ਅਸੀਂ ਲੋਕਾਂ ਦੀ ਸੁਰੱਖਿਆ ਨੂੰ ਮੱਦੇ ਨਜ਼ਰ ਰੱਖਦੇ ਹੋਏ ਪਿੰਜਰਾ ਲਗਾ ਦਿੱਤਾ ਹੈ ਤੇ ਇਸਨੂੰ ਫੜ੍ਹ ਕੇ ਜਲਦ ਹੀ ਜੰਗਲ ਵਿੱਚ ਕਿਤੇ ਦੂਰ ਸੁਰੱਖਿਅਤ ਛੱਡ ਦਿੱਤਾ ਜਾਵੇਗਾ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਸਾਡੀ ਗੱਡੀ ਉਕਤ ਏਰੀਆ ਵਿੱਚ ਰਾਤ ਸਮੇਂ ਗਸਤ ਤੇ ਘੁੰਮਦੀ ਹੈ। ਜੇਕਰ ਕਿਸੇ ਨੂੰ ਇਹ ਜਾਨਵਰ ਕਿਤੇ ਵੀ ਨਜ਼ਰ ਆਉਂਦਾ ਹੈ ਤਾਂ ਤੁਰੰਤ ਸਾਨੂੰ ਇਸਦੀ ਜਾਣਕਾਰੀ ਦਿੱਤੀ ਜਾਵੇ। ਨਾਲ ਹੀ ਉਨ੍ਹਾਂ ਕਿਹਾ ਕਿ ਸ਼ੋਸ਼ਲ ਮੀਡੀਆ ਤੇ ਹੋਰ ਵੀ ਅਜਿਹੀਆਂ ਕਾਫੀ ਅਫਵਾਹਾਂ ਫੈਲ ਰਹੀਆਂ ਹਨ, ਲੋਕ ਉਨ੍ਹਾਂ ਤੋਂ ਗੁਰੇਜ ਕਰਨ।