ਤਪਾ ਮੰਡੀ 27 ਸਤੰਬਰ(ਯਾਦਵਿੰਦਰ ਸਿੰਘ ਤਪਾ)-
ਪਿੰਡ ਤਾਜੋਕੇ ਵਿਖੇ ਵੀਰਵਾਰ ਸ਼ਾਮ ਕੋਈ 7 ਵਜੇ ਦੇ ਕਰੀਬ ਅੱਧੀ ਦਰਜਨ ਮੋਟਰ ਸਾਇਕਲ ਸਵਾਰ ਅਣਪਛਾਤੇ ਨੋਜਵਾਨਾਂ ਨੇ ਕਾਰ ਨੂੰ ਘੇਰਕੇ ਸਵਾਰ ਦੁਕਾਨਦਾਰ ਦੀ ਬੇਸ਼ਮਾਰ ਕੁੱਟਮਾਰ ਕਰਕੇ ਜਖਮੀ ਕਰ ਦਿੱਤਾ ਅਤੇ ਕਾਰ ਦੀ ਭੰਨ੍ਹਤੋੜ ਅਤੇ ਕੁਝ ਨਗਦੀ ਖੋਹਕੇ ਲੈ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਹਸਪਤਾਲ ‘ਚ ਜੇਰੇ ਇਲਾਜ ਸੁਨੀਲ ਕੁਮਾਰ ਪੁੱਤਰ ਸਾਧੂ ਰਾਮ ਵਾਸੀ ਤਾਜੋਕੇ ਦੇ ਭਰਾ ਮਨਮੋਹਣ ਰਾਮ ਨੇ ਦੱਸਿਆ ਉਹ ਪਿੰਡ ਬੱਲ੍ਹੋਕੇ ਵਿਖੇ ਕਰਿਆਨੇ ਦੀ ਦੁਕਾਨ ਕਰਦਾ ਹੈ,ਜਦ ਸ਼ਾਮ ਕੋਈ ਸੱਤ ਵਜੇ ਦੇ ਕਰੀਬ ਭਰਾ ਅਪਣੇ ਪੁੱਤਰ ਨਾਲ ਕਾਰ ‘ਤੇ ਪਿੰਡ ਆ ਰਹੇ ਸੀ। ਜਦੋਂ ਉਹ ਪਿੰਡ ਦੀ ਹੱਦ ‘ਤੇ ਪਹੁੰਚੇ ਤਾਂ ਪਹਿਲਾਂ ਤੋਂ ਹੀ ਸ਼ਾਜਿਸ ਤਹਿਤ ਉਨ੍ਹਾਂ ਦੀ ਕਾਰ ਅੱਗੇ ਮੋਟਰਸਾਇਕਲ ਸੁੱਟਕੇ ਰੋਕ ਲਿਆ ਅਤੇ ਕਾਰ ਤੋਂ ਹੇਠਾਂ ਉਤਾਰਕੇ ਸੋਟੀਆਂ ਅਤੇ ਬੈਸਬਾਲਾਂ ਨਾਲ ਕੁੱਟਣ ਲੱਗ ਪਏ ਅਤੇ ਕਾਰ ਦੇ ਚਾਰੇ ਪਾਸੇ ਦੇ ਸ਼ੀਸੀਆਂ ਦੀ ਵੀ ਭੰਨ੍ਹਤੋੜ ਕਰ ਦਿੱਤੀ। ਜਦੋਂ ਉਸ ਦੇ ਪੁੱਤਰ ਦੀ ਕੁੱਟਮਾਰ ਕਰਨ ਲੱਗੇ ਤਾਂ ਉਸਦੇ ਭਰਾ ਨੇ ਕਿਹਾ ਇਸ ਨੂੰ ਕੁਝ ਨਾ ਕਹੋ ਮੇਰੇ ਹੋਰ ਮਾਰ ਲਵੋ। ਮੇਰੇ ਭਤੀਜੇ ਨੇ ਫੋਨ ‘ਤੇ ਸਾਰੀ ਕਹਾਣੀ ਦੱਸੀ,ਤੁਰੰਤ ਘਟਨਾ ਥਾਂ ‘ਤੇ ਪਹੁੰਚਕੇ ਜਖਮੀ ਸੁਨੀਲ ਕੁਮਾਰ ਨੂੰ ਸਿਵਲ ਹਸਪਤਾਲ ਤਪਾ ਭਰਤੀ ਕਰਵਾਇਆ ਪਰ ਹਾਲਤ ਗੰਭੀਰ ਦੇਖਦਿਆਂ ਬਰਨਾਲਾ ਵਿਖੇ ਰੈਫਰ ਕਰ ਦਿੱਤਾ। ਉਨ੍ਹਾਂ ਇਹ ਵੀ ਦੱਸਿਆ ਕਿ 3-4 ਹਮਲਾਵਰਾਂ ਨੂੰ ਉਹ ਚੰਗੀ ਤਰ੍ਹਾਂ ਜਾਣਦੇ ਹਨ,ਇਸ ਹਮਲੇ ‘ਚ ਹਮਲਾਵਰ ਕੁਝ ਨਗਦੀ ਵੀ ਖੋਹਕੇ ਲੈ ਗਏ। ਜਦੋਂ ਉਕਤ ਮਾਮਲੇ ਸੰਬੰਧੀ ਥਾਣਾ ਮੁੱਖੀ ਇੰਸ.ਸੰਦੀਪ ਸਿੰਘ ਨਾਲ ਗੱਲਬਾਤ ਕੀਤੀ ਤਾਂ ਦੱਸਿਆ ਕਿ ਜਖਮੀ ਦੇ ਬਿਆਨਾਂ ‘ਤੇ ਜੋ ਵੀ ਕਾਰਵਾਈ ਹੋਈ ਅਮਲ ‘ਚ ਲਿਆਂਦੀ ਜਾਵੇਗੀ।